Asep Saeful Azhar

Hari Senin

Agama | 2023-07-25 02:02:31

Poéan Sénén

Patanda poé jeung silih gantina waktu téh nandakeun alam pikir nafsi-nafsi jalma, aya nu hariwang kasimbut kamelang, aya nu biasa-biasa baé, oge aya nu nyorang nungguan ku harepan suka citana, atawa rarasaan nu pacampur-baurna.

Mun dititénan dina rubahna waktu sok karasa asa cik kénéh atanapi mangsa nu kaliwat téh kacida sakocéakna. Peun, eta nu disebut hakékat waktu. Éces pisan mun dumasar kana spirit surat Al-Ashr ayat ka-1 tug dugi ka- 3 dina tarjamah basa Sundana: "Perhatikeun waktu! Saéstuna manusa téh enya-enya aya dina karugian. Kajaba jalma-jalma anu ariman jeung ngalampahkeun amal soléh jeung anu silih wasiatan kana haq jeung anu silih wasiatan kana kasabaran."

Nu jadi pertanyaan, naha aya jalma nu hayang rugi? Mun dijawab ceuk nalar umum mah euweuh! Sakabéh jalma pasti hayang untung dina tiap-tiap rupa kasab kahirupanana.

Aya anu unik tapi jentre kaharti dina ieu surat Al-Ashr téh nu munculkeun term: Waktu, rugi, jeung pangacualianana. Kahiji, kasebut waktu téh sabab Alloh salaku Robb geus susumpah ku ngaranna waktu nu diciptakeunana oge nu mibogana sarta nuduhkeun kamulyaan waktu.

Kadua, rugi atanapi khusr téh nyaéta nu miboga harti nu negatif dina ragam rupana pikeun manusa boh bab morilna atanapi materilna.

Ketilu, pengecualianana teh pikeun nu untung mah kategorina teh jalma-jalma nu ariman jeung nu ngamalkeun amal soleh sarta silih naséhatan dina bebeneran jeung kasabaran.

Sakilas dibaca kaharti naon maksudna Iman jeung amal teh. Moal aya karugian pikeun jalma dina kaayaan iman jeung ngamalkeunana. Mun seug aya rumasa rugi dina kaayaan iman jeung ngamalkeunana, berarti rasana teh geus kaasupan Khusr tadi téa; teu nincak teu napak.

Waktu téh miboga energi jeung tapak lacak pikeun keur nu ngeusina, jodona téh ruang. Kukituna aya istilah ruang jeung waktu. Ari ruang mah dimensi spasial; nyaeta nu nuduhkeun patempatan jeung prosés alur waktu, sadengkeun waktu mah asup kana dimensi temporal; bihari, kiwari, jeung baringsukpagi ceuk dina basa Sundana mah.

Waktu teh ngikeut kana kapastian kajadianana, sabab nu geus kaliwat, keur dilakonan jeung nu rék disorang téh geus kaimpleng dina alam pikir; ruang jeung waktuna.

Balik deui kana poéan Sénén kamari jeung kiwari Salasa ayeuna. Naha karasana dina diri masing-masing masih kénéh aya kaduhung atanapi reueus bagja bahagia? Cag!

Dicutat di Pustaka ASA Rancaekek, 25 Juli 2023